জুম্মবী তর এ দোল্ নাঙর হাবিদাঙ্ হন্যাঁ
{ ১০ই নভেম্বর স্বরণে }
"জুম্মবী"
যে নাঙে ডাগিলে হুজি অচ্,
যে নাঙে বাজিবের স্ববনে দেগচ্,
যে নাঙে পহঁত্যা আমল্যা নুয়ো দিনর,
নুয়ো আঝা বুগোত্ বানচ্।
জুম্মবী হধে চাঙ্, তর এ দোল্ নাঙর --
হাবিদাঙ্ হন্যাঁ? মনত্ রাঘেচ্।
তেহ্ অল' আমা বেগর লারমা লারমা।
যে নাঙান্ বুগোত্ বানি,
সাত্ দোজ্যা ছড়া ঈজি,
রাঙাঁ বেল্ রাঙাঁ আঝা,
আমা বেগরে দিবে আনি।
যে নাঙান্ বুগোত্ রাঘে,
উজে যেবে আগে আগে।
হুজুদি নেজেবে অন্যেয় অবিচার,
আড়াজাঁক্ জঞ্জাল্।
জুম্মবী হধে সে দোল্ নাঙর --
হাবিদাঙ্ হন্যাঁ? মনত্ রাঘেচ্।
তেহ্ অল' আমা বেগর, লারমা লারমা।
যে নাঙান্ আঘে ভিলি,
থেই পারিবঙ্ মিলিঝুলি।
যে নাঙান্ বেগে জানি,
সে নাঙে জাদ্ ভেই মা-বাপ্,
সমাজ্যা সমারী জাগে জাক্ --
ইচ্চা অই পারির চিনেচিনি।
জুম্মবী হধে, তর এ দোল্ নাঙর হাবিদাঙ্ হন্যাঁ?
তে আমা বেগর্, লারমা লারমা।
যে নাঙান্ ন' পেদাক্ আজু-পিজু,
হাদে যিয়ন্ জীংকানি উজু উজু।
এই তর এক্কান্ দোল্ নাঙ্,
যেক্কে অল' ফগ'দাঙ্ ;
উদিল' নুয়ো বেল্!
জাগি উদিলাক্--
মুরুল্লা সিধেসিধি মানুচ্।
গোদা পিত্থীমি অল' ফদাঙ্তাঙ্।
বানা এক্কান্ দোল্ নাঙ্।
জুম্মবী হধে চাঙ্, এ দোল্ নাঙর হাবিদাঙ্ হন্যাঁ?
তেহ্ আমা বেগর, লারমা লারমা।
যে নাঙে এ দেজত্ বুয়ের বাই।
গাজে গাজে ফুল্ ফুদোন্।
যে নাঙান্ পেগো গীদোত্ শুনি পেই।
যে নাঙে জুমোত্ বীজ্-বিজি-
পোগোন্ পাদা মিলি উদোন্।
যে নাঙান্ আমা মনত্ নিত্য জবে,
জুম্মবী তুই হবে,
এই তর দোল্ নাঙর হাবিদাঙ্ হন্যাঁ?
তেহ্ অল' আমা বেগর, লারমা লারমা।
পহঁত্যা রাজি পরি এল',
জুম্মবী তর নাঙর সাম্বাদ্ দেনা --
মর থুম্ ন' অল'।
ইচ্চা ১০ই নভেম্বর ----
জুম্মবী তরে দোঙর্ হবর ;
জাগি উঠ্ ঘুমোত্তুন্, হবং বান্,
এ দিনোত্ তর নাঙর্ হাবিদাঙ্ ---
বুগো লো দিনেই, তরে হোচ্ পেনেই,
ছাড়ি যিয়ে পিত্থীমি।
যাদি আয়, শবত্ হাগি -----
তার বুগো লো দাম্ দিবে,
তর এ দোল্ নাঙর মান্ রাগেবে।
১০/১১/১৪
সোমবার সকাল,০৬:০০ রচনা।
( ৩০)
"সংসার"
ও মন্ যেদক্ দ্যুঙ্ সজ্ ইরি,
ঘুরি বেড়াস্ উড়ি উড়ি,
বেড়ে চা যেক্কন্ পারর লুড়িচুড়ি।
যেক্কে বেড়েবে লুদিধুরি,
ম' হধানী মনত্ তুলিচ্, ফিরিফিরি।
যুদি আওজ্ থেলে।
সংসার হি? হদে চাঙ্।
গমে বুজিলে।
যারে ভাবর সদর ভিলি,
জীংকানি গঙর মিলিঝুলি।
তেহ্ যেক্কে তরে দিব' দুরোত্ ঠিলি,
আবিলেশ্ হে হে ডাগিলে --
পরান্ ফেলেফেলে।
বুজিবে সেক্কে ------
সংসার্ হি!
হদে চাঙ্ গমে বুজিলে।
ভাবদে ভাবদে জীংকানি গেল্।
ঘর সংসার্ ছারানাদা ওল্।
যা এলে গমে এলে,
আর' বেশ্ পেবার চেলে,
হি পেলে? হি দেলে?
যা এল' সিয়ানও আরেলে।
সংসার্ হি?
হদে চাঙ্ গমে বুজিলে।
হা হধা হন্যাঁ শুনে।
যার যে মন্ জনে জনে।
যার যে দগে বুজি মনে মনে।
হা হবর হন্যাঁ রাগায়,
সুগে ওক্ দুগে ওক্ আগায় আগায়।
ভাবী চেস্ এ হধানী,
সোচত্য ভিলি জানিলে।
সংসার্ হি?
হদে চাঙ্ গমে বুজিলে।
যেদক্ থেবার চাস্ আওজ্ গুরি।
যেই পেবে একদিন্ সংসার ছাড়ি।
হন্যাঁ যেব' ত' লগে?
ভাপ্যুচ নি গমেদালে?
ও মন্ বুজি শুনি চল্।
গম্-ভাঞ্যেঁ দ্বিয়ান্ নাঙ্।
যিয়ান্ মনে হয় সিয়ান্ থাঙ্।
ও অবুঝ্ মন্--
সংসার্ হি?
হদে চাঙ্ গমে বুজিলে।
২১/১২/২০১৪
( ৩১)
"যা দগে তেহ্"
যুদো যুদো মানুচ্,
যুদো যুদো ধক্।
ভাবনা বেগর যুদো যুদো।
হিয়ে পেল' মনত্ দুখ্!
হি গল্ল' ইহিঁজক্।
ত' মদে যিয়ান্ অয়,
ম' মদে সিয়েন্ নয়।
যে যার মদে অদেঅদ্।
ধুরিলে নেই ছাড়াছাড়ি,
বংশ উবোদ্ মারামারি!
ওই যোক্ পিত্থীমি ক্ষয়!
বুজিনেই ন' বুজি,
শুনিনেই ন' শুনি,
হেজ্ পাদে মনে মনে।
মুগোত্ বেগর দোল্ হধা।
অন্তরে অন্তরে জানে তিদা-মিদা।
ঘুমোছল্ ধুরিলে,
হুভাচ্ হুচিদে মনত্ উদিলে --
মিলিনেই গোদা পাড়াল্যে--
ন' পারে জাগে হিয়রে,
যুদি নিজে ন' জাগিলে।
যে যা দগে তেহ্ দোল্।
বেগর এই দোল্ নিনেই,
পিত্থীমি ইচ্চা ওই যার ওল্।
বেগর মন্ দোল্ অলে ---
গঙেবার দিনুন্ গঙেদঙ্ গমেদালে।
ন' থেদ' হিংসে পিঝুম্,
রেজারজি, ভারাভারি, মারামারি।
ন' থেদ' মনর হুলুক্,
ভেইয়ে ভেইয়ে, বাবে-পুদে লড়ালুড়ি।
মাঞোঁরে ভাবী নিত্য অঁশিঁজিঁ।
লেদাপেদা গুলিমিল্যা হাজরে।
ঘিলেহোজোইয়ে নিত্য বুর পারি,
হদক্ পবিত্র ভাবী নিজরে।।।
২১/১২/২০১৪
( ৩২)
"জাগি উদো মা-বোন্ লক্"
জাগি উদো মা-বোন লক্ --
হিয়া মুজুরি।
লামি এজ' রাজ্ পহধত্,
লাজ্ ডর ছুমুরি।
সংজয়ারে জাগে তুলো,
গোদা পিত্থীমি।
তোমার আগে শক্তি সাহস্,
দেগেই দোগি তুমি।
দেজ্ বাজ', জাদ্ বাজ',
বাজ' ইজ্জদ্ মান্।
দেজত্ আন' চিদ্ ভুজিবার,
পুর্নিমা দিনোর চান্।।।
২১/১২/২০১৪
( ৩৩)
"নাদানত্ পুরিবার পথ্"
গুত্ বলা মুবাইল,
হধা হদে ন' ফুদে ঈল্।
পরানে মাগে স্কীন্ টাচ্।
পর্দা ডাঙর বেদারী চিগোন্,
এক্কা ছ'বাই নয়য়ো ঠিগোন্,
তুগুত্ তুগুত্ ফুরায় চাজ্।
গান্ শুনিবা নেনা ফুদো চেবা,
যেত্তমান্ আগে শাওন্ দিবা,
ছ'বাই নেদি রেচ্।
তা আহধত্তুন্ তা আহধত্,
হিঙোরী পরিবা নাদানত্,
পাচ্ ছ' মাজে শেজ্।
আদামে আদামে দোগান্ ঘর,
আহধ্ পুনোত্ পুজি দিবা লর।
হারা হবা নেনা, গপ্ দিবা।
পরানে মাগিলে বাগি হ'।
হধায় হধায় জোল্ বাজ',
পহঁত্যা রাজিত্ ঘরত্ ফিরিবা।
বাগি হাদা ভরি গেলে,
বাজিবের ছ'বাই উবোয় ন' থেলে,
ম' হধানী ধর'।
ফুগুদি হানাদি পহর দেলে,
টেঙাঁ পয়জাঁ ফুরেলে,
বা'জি বা'জি নম্বরত্ য'।
মদ্ হেবা নেনা গাজা হেবা,
সমাজ্যা গুলোদক্ মিলিবা।
এক্কাউক্কো দল্ গর'।
নিজো দুশ্চানী ত' গুরি,
মাঞ্যেঁরে চেবা ভ' গুরি।
দুজোত্ পেলে ধর'।
সংসার্ অয়ে মেলাহোলা,
হধানী হবা আলাঝালা,
যুদি ফুগুদি হানাদি পহর দেগ'।
টেঙাঁ পয়জাঁ বেজ্ অলে,
বাজিবের যুদি আলজি গল্লে,
নম্বর ধুরি গব'।।।
২২/১২/২০১৪
( ৩৪)
[ জরা ন' বুত্তে ভাবনানি ]
পেদেরা-পেদোরী, ছাদারা-ঘাদারা--
ভাবনানি উদো মারে।
ছিনে সুধো মু নেই পারা,
হারলোই হিয়রে জরা বুদে ন' পারে।
মনে অয় শারাল্যাচিল্ অঙ্,
উড়ি বেড়াঙ্ গোদা পিত্থীমি।
মিলে চাঙ্, বেক্ জাত্তোই আমা জাত্তোরে,
পরি আগি হুধু আমি।
ঘুড়ি বেড়াঙ্ পত্তি ঘরে ঘরে,
ভাক্ লঙ্ নিইয়া মানজ্যর দুখ্কানী।
ছিদিদ্যুঙ্ বেগরে চিগোন্ চিজির --
মা'হরর নাগর' আওজ' সুখ্কানী।
অত্তে অত্তে মনে অয় জুলি উদোঙ্!
দেবা ঝিমিলানি হানফাদা দেবা পেরাগে!
যেদক্ অন্যায় অবিচার পিত্থীমিত্,
দুলি নেজাঙ্, উজে যাঙ্ আগে আগে।
বড়্ ভুজোলে হুত্তিং হুত্তিং গুরি,
গোদা পিত্থীমি ভাজে দ্যুঙ্ সাগরত্।
নুয়ো গুরি সাজেই তুলোঙ্ পিত্থীমি,
বেক্ পরান্ বলারে ফুল' পাগোরত্।
ন' থেদ' আর হোনো দুখ্,
পেলাঙ্ বে যেদ' হুজিয়ে।
পেলে পেলে অই উধিদো মনানি,
নাগুরী চিগোন্ চিজির আজিঁয়ে।।।
২২/১২/২০১৪
( ৩৫)
দ্বিবা চোখ্ হাধি চাঙ্,
ইক্কুয়া চোখ্ হুলা যার।
সে চোখ্কুয়াত্ রাঙা য়েল্ (হলদে),
স্ববনানি ভাজি থাহর।
রেত্ নিজির হালা আন্ধারত্,
থাঙ্ বিচ্চোনত্ পুড়ি।
পহরে পহরে জুনোর ছহদগে,
আগাজত্ বেড়াঙ্ উড়ি।
পিদিত্ ইক্কুয়া পুল্ল্যাঙ্ বুগি,
আগাজর ফুত্যা সুধোনী লঙ্ পেদে,
ভেগত্ ভেগত্ মুয়োত্ আজিঁ মর,
হিজু রেঙ্ হিজু গীদে।
হাজলঙ্ হুলোর গারেঙ্ ঘরত্,
চাজাত্ আগঙ্ পুড়ি।
সেঙেঁ হুলোর গাজ' ছাবায় ছাবায়,
মুই বেড়াঙর ঘুরি।।।
২২/১২/২০১৪