বানি থোই দিস
চিগোন্ এক্কান্ মন্,
হিঙোরি বাহনি থং।
আমিজে উড়ি বেড়ায়,
থেক্ নেই ঘুরি বেড়ায়,
এ মাধা, ঔ মাধা ;
ন' শুনে ম' হধা।
যুনি ভুঙিঁ পড়েগি ত' হায়...
হঙর চ্যা পরানি,
দিনেই তর তেপ্ ন' পুজ্যা মিধে আঝি,
তর মনর গুধি ভিধিরে পিজি পিজি,
থোই দিবে বাহনি।।।
মরে যায় ঘুমোত্ ফেলে,
হুচদি বেড়ায় দোলেদালে।
শিল-চাদারা, ধুধুক্, রিঝাং,
ঠেগা, শংখ, সেঁঙেঁ, মিয়োঁনি, লোগাং, বড়গাং।
হোই ন' পারং হি পেদ' চায়,
সেনে হঙর পরানি ;
যুনি ভুঙিঁ পড়েগি ত' কায়।
ছাড়ি ন' দিবে হন' পাগে,
বাহনি থোচ্ছোই আগে আগে।
হঙর চ্যা পরান্ দাবিদাবি।
তর মনর লুও সুন্দুগোত্,
ভরে থোচ্ছোই চাবিচাবি।।।
ন' লাগে রোদ্-ঝড়,
ন' লাগে দিনো পহর।
উড়ি বেড়ায় সপ্পানিত্,
জুমোর ফেঝেরা পত্থানিত্।
রাঞ্যাঁ মোনোর ঘরানি,
লারিলুরি চায় ফেলে যিয়া পঝানি।
সিয়েনি দ' ইক্কে নেই,
বেক্কানি আড়ে ফুরেয়েই।
চুধো চুধো ঘুরি বেড়ায় ;
সেনে হঙর চ্যা পরানি,
যুনি ভুঙিঁ পড়েগি ত' কায়,
চোঘো ইজেরেলোই বাহনি থবে,
মনর পিজুম্ বাজত্।
হঙর চ্যা দাবেরে দাবেরে,
বাহনি থবে হাদি পেজ' সমারে,
তর লুক্কি বুগোত্ আবেরে।।।