চিগোন আওজ
পার্বো বাজর থক কুবি কুবি।
সাগরর হোচপানা মনত জুবি।
বানিম্মোই ঘর মোনো পিদিত,
যুনি তুই ম' বুগোত এজস ফিরি।
চানা, সিংগবা, ওজোলেং...
গুধিত থোইদিম ফুলবারেং।
হাক্কন তদকতক তদকতক গল্লে,
ছারা গুরি পারং মুই গারেং।
তাগলক পাদি দিম ছড়ানত।
যে ছড়ান ন' শুগোয় হরানত।
দোগোন, ভধং, জুরগো পুদিপুদি,
জায়জুগোল গুরি থোইদিম ঘরানত।
দগিনোদি তুলিম ইজোরান।
এক লাগার গুরি পিজোরান।
সাঙুঁদোরোত্তুন দেঘং পারা,
আঝির য়ুঝির তর মুজোঙান।
ইরো পুন্দোরিয়ান কাবিম জুম।
যে উজু উয়ে দজরান থুম।
ধান, সুধো, বীজবিজিদি....
গুনি গুনি কুজিম্মোই দচ কুরুম।
সাবারাং, ফুজিঁ চারা চারা,
আধ ভাবেলে পাহছ পারা।
ছিদিদিম হায়কুরে। তোন রানদে
জেঁঞেঁত গল্লে অয় পারা।
অঘুর বারিজে লামিলে,
দারবো দারা ন' মিলে।
আকাবা থোই দিম দগা বাচ্ছুন,
সেক্কে জুমান কাবিলে।
হুচ্ছেমুচ্ছে অবচ্যে মোন ঘরান।
দর'মরঅ হাঙাঁড়া কেম দ্যে ইজোরান।
ত' করত পুড়িনে সাতবোন তারা গুনিপেলে,
আঝিপুঝি পুরেব' পরান, মর আওজচান।