ফুলফুল চুলচুল্
ইক্ষে হি অইয়ে ভালাচানে? ভাত্ মাগিলে তোন্ আনে,
তোগায় নিত্য উলুঝুল্।
ভাত্তুন্ তোগায় নরম-হরম, তোন্ মাঘে গরম্ গরম,
ফুলফুল্ চুলচুল্।
হধায় হধায় চোখ্ পিজে, এক্কা ছ'বাই ন' বুজে,
এই ফেজান্ তার আর' হুল্।
হধায় হধায় গুত্যা হায়, পিত্থীমিত হিয়রে ন' দরায়,
ফুলফুল্ চুলচুল্।
পুঅয় ন' ছাড়ে হাস্, সারা বার' মাস্,
পাগা ধোজ্জে মাধাচুল্।
হধা হয়দি দাতভিরি, চলা পড়ে ভ' গুরি,
ফুলফুল্ চুলচুল্।
ঠেঙাঁ-পয়জাঁ ফুরেলাক্, সুদিন্ মাধান্ লুগেলাক্,
বজে ন' থাঙরের উলুহুল্।
মোগো মাধা হাঙ্ হাঙ্! পুয়াবুয়ো নিত্য যাঙ্ যাঙ্!
ফুলফুল্ চুলচুল্।
আগে এল' হধক্ সুগোত্, ইক্ষে কুজবা নিত্য মুগোত্,
দুগোর সাগরত্ ন' পার কুল্।
অভাব' সংসার' জ্বালায়, মাধা নিত্য গরম্ থায়।
ফুলফুল্ চুলচুল্।
পান্ আঘে সুবারি নেই, হলারোই ধুন্দো মুলি খেই।
উদ্ধার গরে জ্ঞেদিকুল্।
তোনান্ এদক্ষি নুনজো বেজ্, হিজেনী হার জীংকানি শেঝ্!
ফুলফুল্ চুলচুল্।
ঘর' হামানীত্ আলেইয়া, যুনি বলাঞ্যাঁ পায় মালেইয়া,
পহঁত্যা উধে ঘুমত্তুন্।
ভাত্ ন' খেই মদ্ হায়, থাহরে থাহরে রিনি চায়,
পজাবাচ্ নিগিলে মুগোত্তুন্।
উদোর হেলে ন' সুজে, মাদে নিত্য মিজে,
হেনে হাদেব' জীংকানি!
ঝড় দিলে পানি পড়ে, ভাঙাচোরা ঘরে দোরে,
আর' নেইদি ভাত পানি।
বি:দ্র: ভারতের অরুনাচল প্রদেশ "ডিঙ্ গাঙর র" প্রকাশনায় ২০১৪ প্রকাশিত।