★★এক্ রিনি★★
দ্বি চোখ্ যিদ্দুর যায়,
হি দুরোত্ হি কায় (কাছে),
রিনি চাঙ্ ফিরি ফিরি,
মনে মনে উড়ি উড়ি।
ও মর সোনার দেশ্চান্--
যেদক্ তরে রিনি চাঙ্,
আওচ্ ন' ফুরোয়।
আগাজর সোজো রঙে,
মিজেল্ দিই রঙে চঙে,
সাজিলে কিত্তে এদক্।
য়েল্ য়েল্ ঝুপ্-ঝাড়্,
যিন্দি চেই সিন্দি ওজার।
তর এই দোল্ জাগার,
মুই আগঙ্ এক্ রিনি,
আওচ্ ন' ফুরার।
সাজিলে কা ধারাজে,
মোন্-মুড়ো ছড়া-গাঙে,
খালে-নালে এদক্ আওজে।
আগাজর ধুব্ ধুব্ মেক্কানী,
তরে দিল' মাধাত্ খবং বানী।
নুয়ো বো যেন্ জুম্মবী,
য়াজঙ্ য়াজঙ্ মু, জুমোত্ যেবার।
জুম্মো দা আওজে চে থেবার।
চে আগঙ্ এক্ রিনি,
আওচ্ ন' ফুরার।
ফাগোন্ মাস্ গাজ' পাদা ঝুড়িলে,
কুউ কুউ কোগিল্ ডাগিলে,
দেবায় চোখ্ চোখ্ কালা গুরিলে,
বুয়ারে ধুল্যা উড়েলে,
চেবেনি? তুই ত' বুগোত্।
চিগোন্ গুরোয় উদোনোত্,
কিঝিক্ কাঝাক্ কিরিমিরি।
নাজনি পুগোর লড়ালুড়ি।
কেনে ভুলিবার!
বানাহ্ চে থেবার্।
যেদক্ চেদুঙ্ ছাদ্,
আওচ্ ন' ফুরার।
ডগরের অগ'লক্,
আজের নিইয়া জুম্মোলক্।
ঝড়পুদো পুড়িলে,
হের-পদনা উধিলে,
য়েলে মারিলে জুমানী,
কেনে ধান্ কুজোনা কিজেনী।
বৈজাগর ধান্ গোজা,
পুরে দেয় মন্ আজা।
লামিলাক্ জুমবলা।
রেঙে গীদে হৈ হুল্লা।
এ স্ববনানি বাজি থোক্ জুমবলার।
মুই আগঙ্ এক্ রিনি,
আওচ্ ন' ফুরার।
দ্বি চোগোর যিদ্দুর সাল্লেঙ্,
আর' যেবার মনানে --
মরে গরে আল্লেঙ্।
মনে মনে যাঙ্,
উড়ি উড়ি চাঙ্।
ও মর সোনার দেশ্চান্--
এদকহি তরে কোচ্ পাং।
ছেম্ ছেম্ গাজ' করদ্ উধিলে,
য়েল্ য়েল্ তারুম ঝাড় নিবিলি অলে,
দুবো দুবো শনছাবারাং তিদি উধিলে,
মাদি আবাচ্যা ভিঝুরো ফুল্ ফুদিলে,
বানাহ্ চে থেবার্।
আগঙ্ এক্ রিনি,
আওচ্ ন' ফুরার।
ও মর সোনার দেশ্চান্--
তরে মুই কোচ্ পাঙ্।
ত' বুগোত্ জনম্ লোইয়ং,
ত' বুগোত্ বাজি থাঙ্।
ভাদ' মাস্ জুমোধান্ পাগিলে,
পেক্ ধাবানীত্ জুম্মবী কুই কারিলে,
আগাজর শারাল্যা চিক্ চিক্ চিইক্ গুরিলে,
হুয়োঙেঁ হুয়োঙেঁ রয়ে রয় বাজ্যাবাড়ি,
মর এ পরান্ বুক্ ফারিনে নেজায় কারি।
এ রীপরীপ্ র' বানাহ্ শুনিবার।
যেদক্ শুনদ্যুঙ্ ছাদ্,
আওচ্ ন' ফুরার।
এ দেজর চিগোন্ গুরোয়,
ঝড়ে ভিজি রোদে পুরি!
এ মুড়োয় ও মুড়োয়।
লগে তারার কাম্মো মা-বাপ্।
কাদাদন্ জীংকানি এ চাপ্ ও চাপ্।
থিদো নেই জীংকানি!
কন্ গোজেনে বানেল' কিজেনী!
মনে অয় চে থাক্।
লবার মনে কয় ভাক্ দুখ্কানী।
গঙিযাদন্ দিনুন্। গুঙিঁ যার।
আগঙ্ এক্ রিনি,
আওচ্ ন' ফুরার।।।
২২/০১/২০১৫