★★ আমা আদামত্ ★★
তুই কি যেবে ভেই, আমা আদামত্?
গেলে দেগিবে---
আদামর্ বেক্ মিলেদলা,
আঝি রঙেঁ খোলা মেলা।
ননন্-ভোজ্, শুড়ি-বো'ই,
মনর্ কধা খুলি কোই,
গপ্ মাত্তে----
নুন্যেশীলো কুয়োগাঙত্।
দগিনো পিবির্ পিবির্ আহবানি,
সেন্, আম্-কাট্তোল্ গাজ' ছাহবানি।
কারি নেজায় মনানি।
জুড়ে দেয় মন্ পরান্,
ঈদোত্ উত্ত' নয় ভেই তর্ ঘরান্।
যেবেনি চা, আমা আদামত্।
ডুবি ডুবি গাদি পারিবেগোই,
শীলকোনা মোরোঙত্।
বেক্কানি চৌচালা, দোচালা মজাঘর্।
জ্ঞেদিকুলেদি মর্ বেক্কুন্ সদর্।
কোচ্ পেবাক্ বেক্কুনে তরে,
বলাঞ্যাঁ দিবাক্কে চো ঘরে ঘরে।
পার্বূয়া চাজা, চানা ভুরোত্ য়েলানদি,
খে পুরেদে নয় লোবিয়ত্ আধেদি।
আদাম্ দীঘোলি বেড়েবংগোই,
টাঙিঁয়া ঘিলা লুদি দুলোনত্ ধুলিবংগোই।
গপ্ মারিবংগোই -----
সমাজ্যা-সমারীলোই জুন্ পহরত্,
ভাঙী পড়ে সং বোইনে ইজোরত্।
ভাবী চেস্ যেবেনি, আমা আদামত্।
জুম্মবি বে হেংগ্রং বাই,
উঃ! মরে ভারি কোচ পায়।
কিজেনী, কন্ জনমত্ এলঙ্ আইপায়।
শুনে পারিমবোই তরে শিঙাঁ র'।
সিধু সমাজ্যা-সমারী গ' গ'।
যেক্কে বজিবং ইজোরত্ বেক্কুনে,
যুদি যাস্-----
ত' আদামান্ পুরিফেলেবেগোই সেক্কেনে।
কদে কদে চোগোত্ ভাজে মর্ মনত্।
যেবেনি চা ভেই, আমা আদামত্।
পহঁত্যা রাদাঁকুরা ডাগে,
পুত্তিদিন্ ভুজি হামাক্কায় জাগে।
মাধাত্ ধুব্ খবং বানি,
ভাত্-তোন্ রানি।
আগা পাদালোই ভাত্ মজা,
দাধা জুমোত্ যেবার্ বেক্ পঝা,
দেগিবেদে যায়জুগোল্।
তুই ঘুমোত্তুন্ উধিবার্ আগে।
সিধেন্ দে'দি ঘরানি,
আলুলো দুলুলো মনানি।
সুগে-দুগে এক্ সমার্,
নিচিদায় দিনুন্ গুঙিঁ যার্।
ঘর্ অলগি ইরুক্ ছ'কুড়ি।
গেলাক্কে দিনুন্ গম্ গুরি।
"ঘরপাদা জাগা" মর্ এ জাগানত্,
জুরি থোলুঙ্ সেনত্যায় মর্ মনত্।
মেইঁঞ্যা দোইয়া পেবেগোই সপ্পানত্,
যেবেনি চা ভেই, আমা আদামত্।
আদাম' ধাগেদি গঙাঁর গঙ্গি ধার্,
যেন্ তিনাঙ্, ঠিয়িনিছিনা, উভোলফাল্!
যুক্ যুক্ ধুরি বেহ্ যিয়া ছড়ানাল্।
ছড়া পাড়ত্ বজিবে,
রিনি চেলে পহন্ পানিত্ ---
তর্ কিয়া ছাহবাবুয়ো দেগিবে।
যুদি যাস্-----
এ জাগানি ফিরি ফিরি,
ভাজী উধিবো তর্ মনানত্।
কোজুলী গরঙ্, ভাবী চেস্ ভেই,
যেবেনি একবার্ তুই,
আমা আদামত্।
দভাকাদি বিরেজর্ নাগরানি,
ভাত্তুয়া মনার্ কেরকেরানি,
গাজে-বাজে পেগোগীদে সাজিয়া,
মোনো ধাগত্ বাহচ্যা আদামান্।
সুগে গুঙিঁ যেদ' ভিলি মর্ জনমান্।
শন' পেজারে ছেলিয়া ঘরানি,
কি দোল্ আদামর্ মানুচছুন্,
সিত্তুন্ দোল্ বেগর্ মনানি।
আমা আদামান্ সেত্তমান্ দোল্,
যেন্, জুম্মবির্ ফুল্ তুল্যা "আলামান্"!
চে পারিবেগোই ভেই, কত্তমান্ দোল-----
আমা আদামান্।।।
২৬/০১/২০১৫