কবিতা
ঢেব' থেব'
লাগত্ পিয়োনি দুখ্ দরপ্ ;তিদা নেনা চরপ্।
ঘরপাদা জাগা ছাড়ি,
ইলে ইলে, বিলে বিলে,
তবরক্ তবরক্ জীংকানি!!!
ন' মিলে কামকরচ্,
ন' মিলের ভাত্-পানি।।
কদক্ হেয়োং.....কাজ্যা চোলোর রিবেঙর ছুয়াত্ ভাত্।
হুত্তুন্ কি অল'..... ।
ঢেবা পিগিরের ঝাকঁ,
উড়ি এই, জুরি বোই কাড়ি ললাক্।
সুখ্ গেল' ভাজী.... !
হে লদন্ চাজি চাজি!!!
ইক্কে ন' কুলোর,
পিলে তলার, পুড়ি যিয়ে,
কালা কালা চাম্ভাত্!!!
তা মূ চেই, তা মূ চেই,
গঙেঁর জীংকানি।
থোক্ ন' থোক্ ভাত্-পানি।
যেক্কে রুয়োবাজ্ গুনিপারে,
উজুনো আমিলে ঝুলানত্।
সেক্কে ঈধোত্ উধে...... ,
... এদক্কন্ মাধারাঙাঁ উয়েভেল্ ;ফেলে ইচ্চা ভুইয়ানত্!!!
পেঠ্ পুড়ে ভিলি,
কদক্ হে পারে মূলী মূলী।
নুন্-মুরিজোর রাহ্ নেই,
ইয়ো কি কাদের রাতকাল্।
ইক্কো বজরর বাহ্ নেই,
উধিবার বুরুজ্, বানেবাক্ চবাশাল্!
ন' মাধি, ন' বুলি,
যুনি অলর গুরি থেই।।।
===================