অদুঙ্ যুনি
যুনি গেঙখুলি অদুঙ্ -----
পিজেদি বাঞাঁমোচ্যা বেলা বুগি,
আদামে আদামে ঘুরি ঘুরি,
রাদামন-ধনপুধি পালা,
চাদিগাঙ্ ছাড়া পালা আ--
সয় সাগর উভাগীদ্ শুনেদুঙ্।
কাহদি মাস্যা জুনপহরত্,
ইজোর ভাঙী পড়ে সঙ্ মোন্ ঘরত্।
দিনেই বেলাতাদত্ আহধতানি,
শুনেদুঙ্ জুম্মোবী কল্পনার দুগো গীত্তানি।
রেঙোঁ চাগে হুয়াঙ্ গুজুরি উধিদো,
ধিগ্-ধিগেই উধিদো মোনো ঘর।
সুগো হধায় আহজিঁ পেলাঙ্ বে যেদ',
দুগো হধায়, চোগো পানি ধারা বেদ'।।
যুনি হাবিল্ হোবি অদুঙ্ ----
তিদে হধায়ান্ মিদে বানে,
মিদে হধায়ান্ তিদে বানে,
শরপ্ শরপ্ আ তুমবাচ্ গুরি,
ননেইয়া ননেইয়া দোল্ দোল্ হুবিদা--
জাদর ভাচলোই লিগি যেদুঙ্।
মর পত্তি অহরগে অহরগে ফুদিদাক্,
সদরকফুল্, নাকশাফুল,----
মর জুম্মো ভেই-বোনুনে ভঙরা অই--
সেই ফুলুনোত্ উড়িদাক্, বুজিদাক্।
তেবেতেবে মধুয়ানী হেদাক্।
ঈল্ অই হোচ্ পেনেই জাদর ---
ভাচচানীত্ পালঙ্ বাজেদাক্।
হোবিদার পত্তি অহরগে অহরগে থেদ'---
জুম্মোবী দোল্ দোল্ রাঙাঁ স্ববন্,
এ দেজর মোন্-মুড়ো ছড়া-ছড়ি,
ভুয়ে-জুমে সুগে সুগে,
বাবে-পুদে ভেইয়ে ভেইয়ে,
নেগে-মোগে তিতব্বর আ-------
হধা বাত্তায় ধরাধুরি।।।
২০/১২/২০১৪
( ২০)
"এগা দারু তালিক"
বরবাদ্ যেবার মনে হলে,
ফুগুদি হানাদি পহর্ দেলে,
টাচ্ স্কীন্ ফোন্ হিনি ল'।
ইন্টার নেদত্ সমেবা,
ফেসবুক্ আইডি হুলিবা,
ছাদাবাগুজো পোষ্ট গর'।
রেত্ বারতা বিঞ্যাঁ ছ'টা,
গ্রামীণফোনত্ ফিরি ডাটা।
এত্ত' বড়' সুযোগ!!
বই পত্তর ত' গুরি,
চ্যাটিং গর' মন্ পুরি,
টেঙাঁ-পয়জা ন' যাদোক্।
ঘুমোমাত্তল্ যুদি থায়,
হুনদি হুনদি এক্ চুনি পায়,
সমাজ্যা মিলিনে থোগে চ'।
মনদি থোগেলে চুপ্ পেবা,
সমাজ্যা গুলোদক্ মিলিবা,
মুগেদি এজে সঙ্ হ'।
এনা বাদে গম ন' লাগে,
হি নেই, বিড়ি আগে।
টেঙাঁ লাগিলে ফোন্ গর'।
বরবাদ্ যেবার মনে হলে,
ফুগুদি হানাদি পহর দেলে,
এ হধানী ধর'।।।
২০/১২/২০১৪