চিত্তিবী
বৈজাখ্যা দেবাহালা দিখকোচ ;
মন' হালা ন' দেঘচ।
বারিজের দেবা দর দিখকোচ ;
মর চোঘোপানি ন' দেঘচ।
হধে চাং "চিত্তি" হুধু আগচ???
এ মনত যক্কে গোর উধে ;
মনর দুখকোনি হালামেঘ ওই ফুধে।
ঘুর আঙুঁচ্যার আন্ধার লামে!
ইনজিব পিত্থীমি!
বান ন' মানে ;
হুধু যায় মনানে ;
তান ন' মানে,
অজার পিত্থীমির সাল্লেঙ।
সেনত্তে হং তরে.......চিত্তিবী,
হুধু আগচ।
এ হালা মেঘ তুই হিয়া ন' দেঘচ।
মন্ দুখকোনি বাজ্যাবাড়ি ওই,
মনর আগাজত যক্কে র' ছারে!
ধুমুলুক হেলায় বাঘ' সান!
ন' থায় চিত্তি,
মর পরান!
সাজেইয়া এ মনর সনার লঙ্খা,
জুলিপুড়ি ছারহার!
ধুম ধুম ভাঙীঁ পড়ে!
হধে চাং চিত্তিবী হুধু আগচ?
এই হানফাদাঁ পেরাগ' র' ন':হিয়া শুনচ।
পেরাগ থামেলে,
হালামেঘ ঘনেলে ;
দ্বি চোঘোত বারিজে লামে।
এ মনর হোনাহুনি ঝুপঝাড় ;
মোন-মুড়ো,
বিলপাদার।
পেলে পেলে পানিয়ে পেলাংবায়!
চোঘোপানি ধারা বায়।
ন' ফুরায় চিত্তি ন' ফুরায়।
হধে চাং চিত্তি........এ সায়র চোঘোপানি ন' দেলে ;
এদক দিন হুধু হুধু রলে???