মুই আগঙ্ ত' লগে
ধেক্ দিঘোল মোন্ মুড়ো উদ'দে,
যুনি তর বল পড়ে.........শুনি থাক পরানি,
মেহ্ যুনি পে থাচ্ হোচ্,
ম' নাঙেঁ এক বুক্ নিজেস লোচ্।
মনে ভাবীচ নিজেজ' সমারে,
মুই আগঙ্ ত' লগে।।
ছিনেছিঞ্যাঁ নাঙেঁলর দিঘোল পধত্,
যুনি স্যংসমা পাহছ্..........ঈধোত্ তুলিচ্ পরানি,
গেল্ বজরর মোনো পিদির ঘরানি,
তরমর চলাচুলি,
আঙেঁয়্যা ভোঙেঁয়্যা হধানি।
থেদ' নয়চ্যা ডরভর,
যুনি ভাবচ্.......মুই আগঙ্ ত' লগে,
সাঙেঁত্ সমার জনমভর।।
আড়বুয়া মোনোর রাণীহুয়ো দেঘিনে,
হনদিন যুনি তর চিত্ ন' ভিজে......হুলি লোচ্ ছাম্মুয়াত্তুন্,
ঈধোত্ তুলিচ্ মনত্তুন্।
হেংগ্রঙর ননেইয়া ননেইয়া হধানি।
দিম্ দিম্ দিম্,
দিম্ দিম্ দিম্.....ছাড়ি ন' যেম্ হন' দিন্.... ।
চিত্ ভুজিবো চ্যা পরানি।।
ন'লে সুরতুলি শিঙেঁ বেভে........ওঁয়েঁতেঁ ওঁয়েঁতেঁ........দাধো..... এধেদো এধে.......তর শিঙেঁ রয় যেক্কে হুয়োঙ্ গুজুরিবো,
ভাবীলোচ্ ত' শিঙেঁরত্ ভিজঙর।
মাধা বুরপারি গাধঙর।
দেঘিবে সেক্কে তর চিত্ ভুজিবো।
যুনি ভাবচ্ সুঞ্জুগে,
হামাক্কায় মুই আগঙ্ ত' লগে।।
ঘুমে ন' ধুরি যুনি.......হায় রেত্য দিঘোল পাহছ্।
ন' মাধিচ্ পরানি ছন্দভাচ্।
ন' হেচ্ তুই এগোর ওগোর,
পাদে থোচ্ সাঙুদোর।
মনে মনে ভাবী লোচ্,
মুই আগঙ্ ত' ধাগত্।
ত' আধতান্ ভাবীচ ম' বুগত্।
তরে মুই.......লাঙ্যাঁ লাঙোঁনির সুখ-দুঘো দিনুনর,
চান্দবী,
মিয়াঁবী বারমাস্যা লামানি শুনাঙর।
যেক্কে তর চোঘো লেজে....পহন্ পানি পড়িব'.......ঘুমোবীজে উজান্ বেভ'চ্যা পরানি,
এক্কু লেজায় পহর অব'।।।
০৮/১০/২০১
১৭১)কবিতা
জাগুলুক্ মন্.....
বন্ ফরাহ্ নয়,
মন্ ফরাহ্.......ভাবনাত্ লামং নীজিরেদ,
জাপুলুক্ মনান্ মর সেত্তেরাহ্।
ছলঙে নয়,
বানাহ্ মনানে........পিত্থীমির সাল্লেঙত্ ভয়ঁঙগোই,
পত্থমে নয় বো স্ববনে।
ভাঙাঁচোড়া ঈধোঘর..........মকতবা উয়ন্ ঠেল্যাথক্,
উধি ন' পারে ন' ছুয়ায় ভর।
আধ্ দি চাং পুচ্ছে পুচ্ছে........লেবেরা-ঝেভেরা ঈধোঘর' মাজারা,
উয়ে বেক্কানি লিপ্যেপুচ্ছে।
ভাবনার শেঝ্ নেই,
ভাবনা...........দেজনেই মানেওর,
লাদি-ভুক হে তরানা।
রাজ্ পধত্ তোগে বেড়াং,
জুমো মাজারা....এগা পধে যাধে যাধে,
পধত্ অয় দজরাহ্।
বন্ ফরাহ্ নয়,
মন্ ফরাহ্.......আধি বেড়াং নীজিরেদ,
জাগুলুক্ মনান্ মর সেত্তেরাহ্।