পিচ্ছোটান্ (পিছুটান

যক্কে মর হিচ্ছু ন' এল',

ডর ন' এল' আরেবার।

সক্কে মুই মাধি পাত্তুং,

গুরি পাত্তুং,

ধুরি পাত্তুং,

লাড়েয়ত্ যোক্-থোক্ পরান!

পাত্তুং গুরি মরং-বাজং!!!

ন' চিন্দুং হোচপানা হি জিনিস্ পরানর।

স্ববনে দেদুং ঘুম্ নেইয়া দ্বি চোঘোত্।

ডেমাডেম্যা সমাজত্,

জিরেননিয়া লাড়েয়ত্।

চারঘার লুগাঙর,

ন' ভাবং মরনর!!!

বেদমা-হুদুগী,

নাধা-ঠাউয়্যা,

ন' থেদাক্ পিত্থিমীত্ চুজি হাউয়্যা।

অহদাক্ সং মানেইহুল্,

ন' অহদাক্ ফেলাফেল্যা।

এ ধারাজে মনর বার্গীঝাক্উড়বোদোন্ র' ছাড়ী।

হুক্কুরুক্ হুক্কুরাক্ সমাজর আড়াজাকঁ,

হুজুদি নেজেই ফাগি গুরি।

হদক্ স্ববন্ দেঘিদুং.....ডেম্ ন' থাদোক্ সমাজত্ জনমান্ ধুরি।

চুজি হেইয়া নেইয়া পিত্থিমী,

বানেবার ধারাজে,

ভাবীদুং আওজে।

সক্কে হদক্ সো'জে উদিদুং!

পেলে পেলে সুঘোর স্বর্গরেজ্য,

সপ্পানত্ স্ববনে দেঘিদুং।

জীংকানিত্ বাজিবার অর পেই,

ইক্কে মুই আর মুই নেই।

ইক্কে ন' চিনং মুই ন্যেয়-অন্যেয়।

নেইয়ার প্রতিবাদ্ ম' মূয়োত্,

উগুদো মর ডর সপ্পানত্!

ইক্কে মর অ'ভেদর ধন্.....বেগার,

চাগুরী...........ন' বাড়েম্ শত্রু,

যুনি এ'যন্ আহগুরি,

হে দ্যোনদোই এক্ গরাজত্!!!