ভাবনাত্ ভাজদে গম্ লাগে

পিত্থিমীত্ থেদ' এক্কান্ রেজ্য,

যে রেজ্যত্ রাজা-রাণী তুই-মুই।

যে রেজ্যয়ান্ বানাহ্ ইক্কো জুমচাপ্,

নাজি উদিদো কবরক্ ধানে,

চিত্ জুরেদো পেগো গানে,

সে জুমোত্ বুজ্যা-বুড়ি বানাহ্ তুই-মুই।

দাঙদাঙ্যাঁ রোদোত্ আড়া কাজে,

দোদোক্যা গালচাবাত্ যক্কে তর রোদ্ বাজে,

কলা পাদার বিজোন্ বিজি দিদুং।

ধান্ কুজিদং এককুচ্,

দ্বি কুচ্,

হধা হদং নিগুচ্ নিগুচ্।

গবে গবে বাগ' মাধাত্ জুনোপহর ফুদেদং।

মুই মাধেলে তুই আঝিদে,

ন'লে আধ' ইজিরেয় ডাগিদে,

নুদি নুদি দ্বিবা চোঘে রিনি চেই।

আঝিদাক্ রাদাঁচুমো চুলোফুল্,

ছত্রং ফুলুনে তুমবাচ্ ছিদি দিদাক্,

বুক্ ভরন্ হোচপানা জানেনেই।

জুম্ দীঘোলি বাগ' পধ্ ধুরি যাদে,

ঘুচ্যা ফুলুনে তর চুল্ ঝুধোত্ বাঝি থেদাক্,

সাঙুদোরোর পিজুমবাজ ধুরি রিনি চেদুং।

ডেনে-বাঞেঁ ধান্ শিজে,

নানান্ রঙঁর পত্তাপুত্তি পিজে পিজে,

সে লগে লগে মুইও উড়ি যেদুং।

কাদিমাস্যা জুন্ পহরত্,

কহরপাদিনে হেংগ্রং বেধে ইজরত্।

সে কহরত্ মুই গোজ্জেদুং...হাদং-মেলং দ্বি চোঘে।

হোচপানার সায়রর জুনীঝাকঁ,

চেরোপালা ভঙিঁদাক্,

গমলাগে তরে নিনে চুধো চুধো....হোচপানার গঙাঁরত্ ভাজদে!!!

ইংরিজি।