{ চিগোন্ চিজির উদিজে }
গুজি গুজি কানি কানি,
চেরাঙ্ চেরাঙ্ চোগো পানিলোই...
জীংকানিয়ান্ ন' থেবে তুই।
এ চোখ্কুনলোই একদিন্ তুই,
ন্যেয় অন্যেয় বেহ্ লবে।
থিদির-থাদার আধানা ছলাত্ আজার খেই,
আদুঘিলে হিলুঙী আজুরী যেব'।
পারে পারেই হোই হোই ;
আর' বেশ্ তরে...
আধানা উচ্চোমী তুলি দিবেক্।
সেক্কে তেহ্ তর আধানা দর' অব'।
সে তর দর'-মর' আধানাত্ অন্যেয়েনী,
একদিন্ হুজুদি নেজেই পারিবে।
এক অহরক্ দ্বি অহরক্ তর ন' বুল্যা মুয়োত্ মাত্ ছুদিব'।
ছাদারা-ঘাদারা হদক্ ভাচ্ তরে শিঘেবাক্।
পারঙ্ ন' পারঙ্ মাদি বুলি ভেঙেঁবে।
ঘুজিঘুজি তত্তুন্ আর পুজোর লবাক্।
এবার আধানা-মাদানা দর' অবে তুই,
আধানায়-মাদানায় যারা তরে উচ্চোমী তুলি দোন্,
তারা যেক্কে ন' থেবাক্ থেলেও
লুঙোর বুড়ো অবাক্।
গদা পিত্থীমির হাম্ করচ্ তর মাধাত্....
আবর হেই এব'।
এবার তুই স্বাধীন।
তর হুচ্ পরোক্ গম জাগাত্।
তর চোখ্ পড়োক্ দোল্ কামত্।
তর কান্ ওক্ সজাগী,
তর মুয়ান্ ওক্ অন্যেয়র প্রতিবাদী।
গমেদালে রিনি চেলে দেগিবে.....
সিধেসিধি মানজ্যর আরভাঙাঁ চারভাঙাঁ,
দুঘর ভিক্;
কোদোগি মাঞ্যেঁ হিঙোরী ভারেই হান্।
ঊগুদো গুরি.......
তোমার নীতি, হবাল্ হারাপ্ হোই হোই
নিজর হবালরে বাইনী গুরি...
বিল্ডিং ঘরত্তুন্ বাবুয়ানা হোলান্।
দেগিবে আর' রাধারাত্যে হুরো ধক্,
দ্বিবা হেই পেলে লুর বদলানা।
জাদর দুর্দিনোত্ গম্ হাম' নাঙেঁ ফগির অই,
মুরে মুরে দেজ্ জাদ্ বিজি হানা।
দেগিবে দোলানরে লরাদে লরাদে,
গাঙ্ পার অই বেজাদর রুক্কানরে দোল্ দেগি,
রাঙুচ্যা চোখচোমা লাগে রিনি চেই চেই..
বেজাদে মিজি যাদে।
জিদেজিত্যা যুগোত্, জিদ' নাঙে জিদ্ রাগেই,
ধক্ নেইয়া জিদ্ রাগাদে দেগিবে।
নুদি চিজিক্-চাজাক্ র' মেলি বাবুয়ানা হোলাদে।
শুনিবে রঙ-চঙর হধা,
ভালেদী পোইদার...
উগুরেদি নিজরে ভাবদন্।
ধক্ নেইয়া ফেজানী,
নুয়া যারা এত্তন্....
রেদে-দিনে মন্ আওজে তারারেও শেঘাদন্।
দুরত্তুন্ তরে সেক্কে ঈচ্ গোরিবেক্!
অলে লাজেবে তুই,
......লাজেলে থুগিবে।
উধিজ্ গোরি ল' বিজগ্ ঘাদি ল'।
তর হুচ্ন' ন' পোরোক্ অপধে।
চিয়োম্যা মনত্ সাহস্ বানি ল'।
জগার তুল্! দেনে-বাঙে রিনি চেই!
ভেই-বোনুন্ ডাগি ল',
ভাঙী হ' গুমোরত্ ন' রাগেচ্।
হোনাহুনি ঘোনাঘুনি আদাম ছাড়ি,
শহর বন্দরত্ ছিদি দেহ্।
যিধু আগন্ তর লো বলা হুদুম্।
সমাজ্যা সমারী।
ফিরি এত্তোক্ জাদর বুগোত্।
মনানিত্ বানি সুদিন্ মাধানর,
হোচ্ পাহ্ পি আলুলো দুলুলো।
ন' থোক্ আমা ইধু বিজয়গিরি ;
ন' থোক্ চম্পক্ নগর, তেহ্ হি অইয়ে?
নুয়োগুরি বানেই লোই স্বর্গরেজ্য ;
তেহ্ নাহ্ ফিরি এব' "চলাআবে".....
তার নাদিন্ পুদিন্ লোই
জুনো পহরত্....
হিরিমিচ্যা হধানীলোই।।।
বিদ্র:- বনযোগি ছড়া কিশোর-কশোরী কল্যান সমিতি ২০১০ "স্ববন" ও পুলক সাহিত্য সমিতির প্রকাশনা "দঝর" ২০১২ সালে এই কবিতাটি প্রকাশিত।
২০/১২/২০১৪
( ২৮ )
{ ফিরি ইচ্চা সৈন্যর ডায়েরীত্তুন্ }
"জুম্মবী তত্তেই"
দীঘোল্ পোজোচ্ বজর।
ধুমো ছেরে ছেরে!
গুলি ছেরে ছেরে!
শত্রুলোই মোহ্ মি গুরি!
মরঙ্ বাজঙ্ লারেই গুরি।
ঠিগি এলুঙ্ ঠিগি রোইয়ঙ্।
হধে জুম্মবী, এ লাড়ে হিত্তেই?
জুম্মবী মর এ লাড়ে বানা তত্তেই, বানা তত্তেই।
টারেঙ্ রিঝাঙ্ আঙুঁদি ;
মোন্-মুড়ো ছড়া-ছড়ি।
রেদেবিলি ঘুরি ফিরি,
চোগো পাদা এক্ না!
হাদেয়ঙ্ হদক্ ঝুরিঝুরি।
জুম্মবী, হধে এ দুখ্কানী হাত্তেই?
জুম্মবী, বানা তত্তেই বানা তত্তেই।
পেঠপোড়া ভুগোত্ হদক্ হিয়েই,
পোড়া হালা চাম্বাত্।
হিরিঙ্ হিরিঙ্ আমিলা ঝুল্।
ঘুজিঘুজি বাচ্চুরি তোন্।
হুমুরো তোন্ মিজেল্ বাচ্ নেই।
বানা ত' হধা, বানা ত' হধা ---
ভাপ্যঙ্ ভিলিনে।
জুম্মবী, হধে এ ভাবনা হাত্তেই?
জুম্মবী, মর ভাবনা বানা তত্তেই, বানা তত্তেই।
দীঘোল্ পোজোচ্ বজর।
মজা-পুগি, পুক্-জুক্ এক্ বিচ্চোনত্,
হাদেয়েই হদক্ সমারে।
বিচ্চোন্ দ' নয়, রুবোঘর!
ফুল্যাঙ্-হাদ্দোঙ্, ডেমা-ডেম্যা।
অনতিত্যে নিরিতিত্যে সপ্পানত্।
জারহাল্যা উমোহাবর টানাটান্যাঁ।
সুগরে সুখ্ না, দুগরে দুখ্ ন' হোই---
গুঙিঁ যিয়ন্ দিনুন্,
জুম্মবী হধে হাত্তেই?
জুম্মবী মর এ দুখ্ বানা তত্তেই, বানা তত্তেই।
দাঙ্ দাঙ্যা পাগানা রোদ' মায়।
হদক্ সমারে আর গায় গায়।
তিরাজে যেক্কে পরান্ হানে।
হি হলাগাচ্, হি মোজো দেল্,
হুলুক্ পানিয়ানিয়ো তান্ ন' মানে।
ন' গাত্যা, এক্ হাবরে,
ঘামে ভিজি গাদি।
পোজোচ্ বজর হাদেলুঙ্ ---
বানা আহদি আহদি।
জুম্মবী হবেনি, এ দুখ্ হাত্তেই?
জুম্মবী বানা তত্তেই, বানা তত্তেই।
বেল্ পুগো রয় যেক্কে --
তারুম ঝাড় গুজুরি উধে,
আ ধুবধুব্ জুনো পহরানি,
দেগঙ্ ন' দেগঙ্ গুরি।
নিবিলি তারুমোত্ সুধোফুদে।
মনত্ উধে গায় গায়,
চোগো পানি পেলাঙ্ বায়।
তুয়ো হাদেলুঙ্ পোজোচ্য বজর।
শুনিচ্ জুম্মবী, এ আবিলাচ্ হাত্তেই?
জুম্মবী, বানা তত্তেই বানা তত্তেই।
ঘুর বরিজাত্ দেবা দরত্।
বান্দর' ধক্ ভিজি ঝড়ত্।
ভিজে হাবর হিয়েত্ শুগেই।
ওঁমিয়া ওঁমিয়া হর' হর',
হাদাস্যা বাচ্ মিজেল্ দিনেই,
তুমবাচ্ ভিলি মনে গুরি।
ঝাড়ে-জঙলে রোইয়ঙ্ পুরি।
এ দুখ্কানী মনত্ ন' রাগেই,
জুম্মবী, হধে হাত্তেই?
জুম্মবী, বানা তত্তেই বানা তত্তেই।
আগাজর তারা গুনিগুনি,
অগলগ' র' শুনিশুনি,
দ্বি আহধ্ সিধেন্ দিনেই,
পুগোজুন্ পুজিমে যায়।
সাতবোন্ তারা মিলে যান্,
হেচ্চোঘু মাদি পিদিত্ তলে।
শন' হাদা ফুদোদন্ অলে।
হাদেয়ঙ্ দিনুন্ হুম্বিক্ ন' হেই।
হধে জুম্মবী, এ দুখ্কানী হাত্তেই?
জুম্মবী, বানা তত্তেই বানা তত্তেই।।।
০৮/১১/২০১৪
শনিবার
উৎসর্গ:- সকল শহীদ, ও মানবেন্দ্র নারায়ন লারমা স্বরণে।