হোচপানার চারাগাছ
কাক্যাবাচ্যা মর নীরোচ্ মনত্ ;
পাগত্ পুরি তুই কন্ হেনত্।
তুলি পারচনি ঈদোত্ তর মনত্।
জেক্ জেক্ নাহি বিগিদি গুরি ;
হোচপানার বীজি চারে গেলে ।
সিবে বহুত্ আগে মাদি ফুরি,
ছাবা দের মর মনত্ নিলোজ্ গুরি।
যে মনত্ দাদি হের ন' বাজে ;
বিন্যা রাঙাঁ বেল্ ন' আঝে।
যে মনত্ জরান্দি হধা ন' রজে।
সে জাগাত্ তর হোচপানার বীজি,
ভেরভেরেই কেনে উধে তিদি।
ধেলা-পাগোর অ'সায়র,
নিত্য ফুল্ কেনে থান্ ফুদি।
সে গাজর ছাবাত্ তলে,
দিন্নো এলে........
কদ' পেগে নাগর্ মাধি যান্ ;
লাঙ্যাঁ-লাঙোঁনীর ন' ফুরেয়ে গান্।
যে গানর সুরোত্ ফুল্ ছড়া,
ফুধি থান্ করাহ্ করাহ্।
উড়ি যায় তুমবাচ্ চেরোপালা।
মুই নেই ম' মনত্ ;
তুই নেই ম' ধাগত্।
পুরি আগঙ্ আকুলত্ ;
অঘুর নিবিলির তারুমত্!
নেই নেই তর দেঘা নেই ;
নাহি আগচ্ কন্ মনত্ আবর হেই।
পথ্য মানুচ্ ধুরি ধুরি ;
সুখ্-দুগোর্ হধা নিয়ালজি গুরি।
কোই চেলুঙ্ ভাঙীঁচুরি।
এক্কা এক্কা তর মুয়ো আরুক্ ;
আঙিঁভুঙিঁ ঈদোত্ তুলি।
যা চেলুঙ্ কবার ;
কারর ধারাচ্ নেই শুনিবার।
উতসরেবে কমলে তর লাগেইয়া চারা?
বাচ্চে আগঙ্ মুই, কন্ তর কবাল্ পরা!!!
করাহ্ করাহ্ = গাজিক্ গাজিক্।