নাঙ্ তার ভালাচান্,
নাঙ্ তার ভালাচান্,
মোবাইলত্ নিত্য শুনে গান্,
রিনি চাইদি থারেয়া।
পেন্নুয়া তার রান্ সং,
হধা ন' হদে তুলে গঙ্,
নিত্য মা-বাপ্ ভারেয়্যা।
গান্ শুনে তেহ্ আদ্দাঞ্যাঁ,
কাম' নাঙেঁ ঠেঙ্ টাঞ্যাঁ।
তুগুত্ তুগুত্ হায়দি ভাত্।
মুগোত্ তার মুরুব্বী হধা,
পিত্থীমিয়েন্ তার আহধ' পাদা।
যেহ্ তেহ্ আর' ন' পান্ মাদ্।
লেগা-পড়াত্ হি এল'
মাষ্টরে সেদাক্ পাস্ গত্ত',
পাস্ ন' গরে তেহ্ হি অইয়ে?
হন্ মুবাইল হি ফাংশান্,
বেক্ মুই নাঙ্ পাঙ্,
হয়দি হধানী চেদিয়া।
লেগা-পড়া শিঘিলে,
চাগুরি ইক্কে ন' মিলে।
ভালাচান্ হধা।
ভুই-জুমিন বিজি,
লেগা-পড়া শিঘি,
মানুচ্ অই যাদন্ নাদা।
এঘরত্তুন্ ও ঘরত্,
বেড়ায় তেহ্ জুন্ পহরত্।
নিত্য হানত্ ইয়ার ফোন্।
হধা হয়দি মিসকলে,
নিত্য হধানী জুগোল্যে,
যেক্কে পেয়াঁজ, যেক্কে রোন্।
ঠেঙ' মুড়িত্ পেন্ ঊরি,
পিজে দেগা যায় পুনজুরি,
লাদি মাজ্যা বেগ্ বারাত্।
ছিলুম্ তার হাদাক-হাদি,
নেই হার'লোই মাদামাদি,
জেপ্ আগন্ পেনর হগরাত্।
পান' লগে জর্দা খায়,
ছ'বাই ন' পেলে উবোচ্ থায়,
খারা অইদি দিন্ ঠিয়া।
গব্ শুনি তার আহসায়!
পানি তিরাজ্ মুরি য়ায়।
ছমক্ হায়দি আহচিয়া।
নাঙ্ থোইদোন্ আওজে,
ওই যিয়েগোই ফাওজে,
দুশ্চান্ হারে দিই।
মা বুয়া হয়দি বাপপুয়ার দুশ্,
বাপ্পুয়া হয়দি মনাবুয়ার দুশ্।
মুরিয়োই বেক্কুনে নাক্ দি।।।
(ভালাচানে মোক্ লনার আচট্য বজর পর)
"ফুলফুল চুলচুল্"
ইক্ষে হি অইয়ে ভালাচানে,
ভাত্ মাগিলে তোন্ আনে,
তোগায় নিত্য উলুঝুল্।
ভাত্তুন্ তোগায় নরম-হরম,
তোন্ মাগে তেহ্ গরম্ গরম,
ফুলফুল্ চুলচুল্।
হধায় হধায় চোখ্ পিজে,
এক্কা ছ'বাই ন' বুজে,
এই ফেজান্ তার আর' হুল্।
হধায় হধায় গুত্যা হায়,
পিত্থীমিত হিয়রে ন' দরায়,
ফুলফুল্ চুলচুল্।
পুঅয় ন' ছাড়ে হাস্,
সারা বার' মাস্,
পাগা ধোজ্জে মাধাচুল্।
হধা হয়দি দাতভিরি,
চলা পরে ভ' গুরি,
ফুলফুল্ চুলচুল্।
ঠেঙাঁ-পয়জাঁ ফুরেলাক্,
সুদিন্ মাধান্ লুগেলাক্,
বজে ন' থাঙরের উলুহুল্।
মোগো মাধা হাঙ্ হাঙ্!
পুয়াবুয়ো নিত্য যাঙ্ যাঙ্!
ফুলফুল্ চুলচুল্।
আগে এল' হধক্ সুগোত্,
ইক্ষে কুজবা নিত্য মুগোত্,
দুগোর সাগরত্ ন' পার হুল্।
অভাব' সংসার' জ্বালায়,
মাধা নিত্য গরম্ থায়।
ফুলফুল্ চুলচুল্।
পান্ আগে সুবারি নেই,
হলারোই ধুন্দো মুলি খেই।
উদ্ধার গরে জ্ঞেদিহুল্।
তোনান্ এদক্ষি নুনজো বেজ্,
হিজেনী হার জীংকানি শেঝ্!
ফুলফুল্ চুলচুল্।
ঘর' হামানীত্ আলেইয়া,
যদি বলাঞ্যাঁ পায় মালেইয়া,
পহঁত্যা উধে ঘুমত্তুন্।
ভাত্ ন' খেই মদ্ হায়,
থাহরে থাহরে রিনি চায়,
পজাবাচ্ নিগিলে মুগোত্তুন্।
উদোর হেলে ন' সুজে,
মাদে নিত্য মিজে,
হেনে হাদেব' জীংকানি!
ঝড় দিলে পানি পড়ে,
ভাঙাচোরা ঘরে দোরে,
আর' নেইদি ভাত পানি।
বি:দ্র: ভারতের অরুনাচলে "ডিঙ্ গাঙর র" প্রকাশনায় ২০১৪ প্রকাশিত।