ছড়া
দুলো ধুরি থাক্ পরান্,
দুলো ধুরি থাক্ পরান্,
মুই জাল্ মারং।
চুমো খেবাং দি খেবংগোই,
বেক্কুনে পেঠ্ ভরন।
মিলনি পাদা গজর গুরি,
দুলোবো দে ধীবে।
দুলো বে উধি মইঁ কাঙারাঁউন্,
নিগিলি যেবাক্ চ্যে।
শিলত্ তলে জেত্ কাঙারাঁ,
কালা কালা দাড়ঁ।
*ধুধুগোত্ চেলে বানাহ্ ইজা-মাজ্,
অজল্ রিঝাঙ্ পাড়।
চবলক্ চবলক্ ন' যেচ্ পরান্,
ইজা-মাজ্ ঝঁক অবাক্।
জুচ্ জুচ্ গুরি হুচ্ বাড়ে,
ম' পিচ্ছে থাক্।
মানেক্ ভেগেনা,
পাত্তুরি ইজা,
ইক্কোয়ো বাদ্ ন' দিচ্।
টারেঙ্যাঁ বেঙ্,
কোরহুরি বেঙ্,
শিরেয়ুন্ চিবি দিচ্।
নুন্-অলোদ্,
মুরিজ্ ফারি,
হলা গুরিলে।
চনাহ্ চনাহ্ বাচ্ নিগিলি,
লেত্য ঝুড়িলে.......।
চানাহ্ ভুরোত্ বজিনে,
গপ্ মারি মারি খেবংগোই,
পরান্ দ্বি জনে।
কলা পাদার বিজোন্ বিজি,
গরম্ ভাত্ জুরেবং।
মুলুক্ মুলুক্ দাড়ানী,
চিজিরে থোই দিবং।।।
ধুধুক্ - জুড়িত্ পানিয়ে গাত্ হুচ্চে মোরোঙ্।