ঠেঙাভাঙা গীত
(স্টিকারের মাধ্যমে মেয়ে এবং পুরুষ চিহ্নিত করা হলো। যেহেতু দ্বৈত সংগীত(
👩 হমলে এলে ও পরান দা, ঢাকা শহরত্তুন।
আবাদা গোরি আমাইদু, হি উদি মনত্তুন।
হবেনি দাধো মু ধুয়োচ্ছোই কন পোরোত্তুন?
👮 জিদু দাগিরে ন' দেঘং পরান, যিয়ন কন কামত।
গায় গায় গোরি আগচ্ছি পরান, ছিনে ঘরানত।
চিত ন' ভিচ্যে গোরি আগছ সিংগবা দোরানত।
👩 তমা ধক্যান মাজন অদং থেদাক ঘরানত।
আঝি রঙেঁ থেবার দাধো নেইদি হোবালত।
ন' আঙুদিলে হেই ন' পেই মুড়ো টারেঙত।
👮 এক্কানি হধা হুত্তুন শিক্কোছ নদঅ বুজঙর।
এত্তে ন' এত্তে ঠেল্যে মাচ্যে হধা শুনঙর।
আগঅ সান হি নেই পারাপাং, ভাবে বুজঙর।
👩 তুই অলেদে বাবু মানুচ, নদঅ বেড়াচ্ছি।
ঘিনাচ নাহি আমা ঘরান, ন' কিয়া উদচ্ছি।
হেবার দেবার নেই ভিলিনে, পাত্তা ন' দোচ্ছি।
👮 ঘরে দোরে যে ওবো ওক, ঘরে হি গরে।
নাহি আমনে কালা ভিলি, মনত ন' পড়ে।
আকারে ইঙ্গিদে বুজেলে বুজং, ধাবে দে ন' পড়ে।
👩 তরে কন্না কালা হবঅ, আমনরে না মানায়।
দেবাবো এক্কা কালা গল্লে, তোগে ছুপ ন' পায়।
ধেবার নাঙেঁ থেলে দাধো, হিঙোঁরী ধুরি পায়।
👮 এক্কান হধা পুজোর গোত্তুং, হবে না ন' হবে।
হোম ভিলিও লাজাং বুজোস, হি ভাবী নেজেবে।
সিত্তুন আর' হোই ন' জানং, ইজেবে ইজেবে।
👩 বাঃ! এদক ভারী লাজেয়্যে উয়স, হি ভাবছ হিজেনি?
(নাহি) বাঘ্যা মনত যিয়েনি নেই, ভাবস সিয়েনি।
চিগোনত্তুন ধুরি লাগ পেই ইচ্ছস, এম্মা জিংকানি।
👮 তরে বেলে বৌ চাধন চিক্কো, চেঙেঁ থুমোত্তুন।
ইদোত ন' উদিবে চ্যে ফেলে যাদে, আমারে মনত্তুন।
বিঝু অক্তত (হদক) ফুল পাজ্জেয়োই, হুরুক গাজত্তুন।
👩 বৌ ন' যেম দাধো এ জীবনত, বুড়ো ওনেই থেম।
এনেও মরে কন্না লদঅ, নয়য়ো চালা যেম।
তমার সুগোর গিরিত্তি চেনেই বুক্কো মুই জুরেম।
👮 মুই এক্কান হলে তুই এক্কান হচ, হেনে বুজেম্মোই।
নাহি ভাবর ঢাকাত যেনেই লাঙ্যাঁ জুজ্জোংগোই।
এগামন গোরি আগং পরান, আগঅ মনান্দোই।
👩 অয়নি দাধো হনধে শুনং, ফেসবুক হুলিনে।
জনে ভেলে দচ-বারোবো থান, লাঙ্যাঁ জুরিনে।
ন' ভারেস দাধো ত' গুরোবোন, হবে ভাঙীনে।
👮 মিজে ন' হোম হাজা ন' হোম, ছবাই নয়দি নয়।
যে জুরিয়ে আঝার পুরান, ফিকচার দেলে অয়।
চ্যাটিং গরন আওচ পুরেই, পড়ান অয়-লবয়।
👩 তে দাধা তুই হয়বো জুজ্জস, মরে ন' হবে?
দচয়ো জর বা পাচয়ো জর, হুবো ব্যে লবে।
যুনি চিগোন বোন ভাবী থাচ, (মরে) দেঘে তুই দিবে।
👮 এক্কান হধা থুম ন' অদে, আরেক্কান হধা হচ।
তরে বাদে কাররে ন' লোম, (যুনি) মনেদিলে লচ।
হামাক্কায় যুনি ন' লচ পরান, ঠিয়েত ফেলেম বচ।
👩 পারং ভিলি বিগিদি গরং, আহি রাগ উদস,
আড়া পাগুল্যা ত' গুরোবোন, আহি ন' বুজস।
চিগোনত্তুন ধুরি লাগ পেই ইচ্ছস (দা) এব' ন' চিনছ?
👮 বুক্কো যুনি মাম্রা অদঅ, দেঘেদুং ফারিনেই।
চিগোন বুক্কোত তুই বাদে পরান, কিয়র জাগা নেই।
ফিরে ন' দিস তুই মরে পরান, পাঝাত মারিনেই।
👩 মিলে জিংকানি ইচ্ছং দাধো, এদক্কি হদা দোস।
বুক ফাদিলেও মু ন' ফাদে, ভাবে বুজি লোচ।
তমা মরদ জাদিয়ে হোচ ন' পেলে, (আমনরে) কন্না পেব' হোচ।
👮👩এস্যেত্তুন ধুরি হধা দিলং আধে আধ ধুরিনে।
গদা জিংকানি হাদে দিবং ত' করত পুড়িনে।
এই চাগালাত তল্লোই আমি বানেবং এক্কান ঘর।
আঝি রঙেঁ কাদেই দিবং সারা জনম ভর।
১৫/০৩/২০১৮