অলিগীত (ঘুমপাড়ানি গান)
----চিজিক্কো হক্কে ঘুম যেবে??
----নানু অলি ডাগি দেনা।
----দে চোখকুন হাত, অলি ডাগি দ্যং।
এ...ই....ই....ঈ.....ঈ....
অলি... অলি.... অলি.. ই...ঈ....
লোক্কি চিজিক্কো ঘুম যেব',
হেরেংজু ঢুলোনত ধুলি....।
এ ঢুলোনান বুনি দেধে,
ঘুওচেল্যা বোলি।
----ঘুওচেল্যা বোলিরে চিনচ?
---- নাদে।
----শুন!
একবার জুমোত্তুন ফিরদে,
----তারে নিঃ!
----ইঁ!
বাঘকো আকসোয় রয়েদে।
সে বাঘকোরে আজারে এছ্ছে,
ইরি ন' দেয় লেজত ধজছে।
----তর সে বাঘ,
লেজে-হাঙেলে ষুলো আধ!
অলি ডাগি দ্যঙ, চুক্কি থাক।
এ...ই...এই..... অলি অলি।
ত' বাবাহ যেইয়ে জুম রাঘা।
ত' মামাহ যেইয়ে পানি ঘাট।
ঘুম নেজাঙর তরে অলি ডাগি দি দি...
সনার চিজিক, লোক্কি চিজিক,
তুই চোখকুন হাত।
এ....ই....ঈ....ঈ.....
অলি... অলি....অ...লি...ই...
ত' আজু যেইয়ে যক্ষা বাজার।
ত' বে তগাল্লোই পেক ছ' আধার।
ইন্দি তরে ঢুলাদে ঢুলাদে...ই...ঈ...
মর দ' যানে আধ ছুলার।
----ঘুম যা পরান!
ঘুমত্তুন জাগিলে তল্লোই যেবং,
ও..ই.., পুরোন রাজবাড়ী রাণীহাট।
নাগর চিজিক, লোক্কি চিজিক,
তুই চোখকুন হাত।
ই....ই....ঈ....ইঈ.....
অলি অলি অলি.....
রাজার ঝিবোর লাম্বা চুল।
চুলোত গজায় চাম্বা ফুল।
উড়ে আনের সে তুমবাচ্ছানি,
ঐ..ই..ঈ, সেঙেঁ, মিয়োনী, ধুরুং হুল।
উঁড়িং চঙঁরায় ঝক পল্লাক,
ভঁঙরা, পত্তাপত্তিয়ে লর দিলাক।
----জাগিলে তল্লোই যেবং, ঘুম যা!
সেই রাজঘরত, রাণীহাট।
সনার চিজিক, লোক্কি চিজিক,
তুই চোখকুন হাত।
এ....ই...ঈ....এ....ই....
অলি অলি অলি......
২৯/০৮/২০১৮