ঠেঙাভাঙা গীত (2)
যে গানের বাণী বদলায় সুর বদলায় না সেটি হল' চাঙমাদের ঐতিহ্যবাহী "ঠেঙাভাঙা" গীত।
এটি আমার পঞ্চমতম গান।
পঙক্তি গুলো স্টিকার দেখে চিহ্নিত করুন পুরুষ এবং মহিলা।
👩আগাজত উত্তে ধুব মেঘকানি বুয়ারে নেজাল্লোই।
গায় গায় আঘং মোনো ঘরত, চিত ভিজেল্লোই।
ঈদোত উদের সং সমাজ্যা আদাম্যা পাড়াল্যা।
মুই আঘংগি ছিনে ঘরত, পোড়া হোবাল্যা।।
👱এহেম! এহেম! ও গিরোজ, ঘরত আঘনি?
মোন উদিনে তদা শুঘেল' পানি হে পেমনি?
তাল-হদরা র' শুনঙর মানুচ আঘ'না নেই?
ভারী ঈল অভ যুনি পেলে, এক ধার পানি হেই।।
👩মাদিয়ে মাদিয়ে হেই গেলেগোই গিরোজর অমঙ্গল।
এনে আগিদে মোনো মুঞ্জিত ফুরিনে ঝাড়-জঙল।।
ঘরান এক্কা ভাঙাঁদেআই পারিবে উদিলে।
ন' ঘিনেলে ধুন্দো-পানি হেই পারিবে জিরেলে।।
👱মানজ্য ধক দ' মানুচ থান নাঙ' ধক্যান নাঙ।
মনত ন' উদের তরে হুদু দিখকং পারাপাং।।
ভাঙী হোবারও লাজ লাজ গরের হি হবে হিজেনি।
মনত তুলি চেবেনি চিক্কো পুরনো হধানি।।
👩অয়দি দাদো মনত উদের বিঝু বাজারত যেই।
চত্তি দগানত হারু মোলাদে লাক পা পি উয়েই।।
হধা দ' এল' সে বিঝুবোত সমারে বেড়েবং।
যুনি বিস্বাস যাস গদা দিন্নো পদতান চে রোইয়ং।।
👱হধা দ' এল' বিঝু গুলো থোই দিবে ভিলিনে।
উমউম গোরি সান্যে পিধে থোই দিবে পুড়িনে।।
থোই দ্যসনি এনে বিঝু দরপ মরে আক গোরি।
এভ থেবাক যুনি থোই দ্যস পরান মরে চিত পুড়ি।।
👩সিঙিরি ন' হোচ ও পরান দা মর দ' মন কানে।
যুনি চেলে ম' মনান বেক্কান থোই দ্যং ত' নাঙে।।
হালিক দ' মুই ভুল বেদমা হোবারও লাজাং।
চোখ হাদিলে এভ তরে মুই দেঘং পারাপাং।।
👱হয়দিন থেবে ছিনে ঘরত চিকচিক্যে গোরি।
উগুম দিলে বৌ চা এদুং মদ বদল ধোরি।।
হালিক দ' মুই ধক নেইদেআই লভেনি ন' লভে।
চন্দ্র-সুয্য সাক্ষী রাঘে ভাঙী তুই হবে।।
👩আমনে অল' মিলে মানুচ হধাত নেইদে ভাচ।
মা-বাবরে মন পালে দেঘি যুনি লভার চাস।।
মুও পুক্কুন উড়ি যাদন আগাজ ভোমেনেই।
মিলে মানুচ হবর দ' পাস মু থেনেও নেই।।
👫আঝা রাঘেই মুজুঙো বিঝুত সমারে বেড়েবং।
আধে রানি পাজন তোনানি গরবারে হাবেবং।।
গজ্জেপজ্যা দিন্নো এলে বুড়োউন গাদেবং।
জনে জনে ঠেঙত ধুরি দ্বি জনে সেপ লভং।।
জন্মে জন্মে আমারে গোজেন ফারক ন' গোরোক।
দচ মুরুব্বী সেপবট্টানি বেক্কানি আমার ওক।।
০১/০৯/২০১৯