রাজঘর তুলোনা

যেনসেন নয়, রাজঘর উদিবো। হয়বো গুধি অবাক, হয়তালা অবঅ, ইজাপ চলের। উত্তর দোরি অলে জারাল্যা চানাত, ইজরত রোদ ন' বাঝে। পুগ দোরি অলে বেল্যা জুরো আহবা। পোজিম দোরি অলে বিল্যা তাদাক্যা রোদ....। বুদ্ধিপেদা শিয়াল্যা উজোনি একবার লামনি একবার রেনি চাহর। ডেনে বাঙেঁ রেনি চেই গলাহেম মারিনে গালান হাচ্ছোয় হাচ্ছোয় রাজারে কলঅ, কত্তাবাবু রাজঘর দোগিন দোরি অলে দোল অবঅ। জারাল্যা ইজরত বোইনে রোদ পোয়ে পারিবে।

এনে ইমিল্যা জার বেশ পড়েত্তেও অয়। রাণীয়ে আমিজে হয়, কত্তাবাবু হমলে ঘর তুলিবে। ঝাড়ত বেক এ্যমানুনর রাজা অলেদে তুই। তর হি ঈলেইলে বিলেবিলে মানায় নাহি? সিংহবো ভাবী চায়দি অয়দ এনে। ঘুঙুঁরোবোর যুনি দোল ইজরতুল্যা ঘর থে পারে আ এম্বা রাজা ওনেই তার ঘর নেই, ভজান ইজ্জদর হধা। মাত্তর বানাহ ক'লেদ' ঘর ন' অয়। হুদু ইটদলা, হুদু সিমেত, ভালক্কানি জায়জুগোল লাগে।

সিংহবো : তে পুণ্ডিক বাবু যাদিমাদি বুদ্ধি দে। শিয়াল্যারে ক'লঅ।<br>শিয়াল্যা :- কত্তাবাবু এক্কান বুদ্ধি গর, তুই তর বেক প্রজাউন টেম্মাঙঁত ডাক। হিত্তে বেলে, এচ্যে মাদি কাবা পুড়িবো, গাজ-বাশ থুবো পুড়িবো। ভালক্কানি কাম। এনেতেনে মুজুঙোঁ বুধবারর পরে বিষুদবারে টেম্মাঙর পুর ঠিক গল্লাক।

বেক্কুন দ' ঘরবায়ানে একজনে বলাঞ্যাঁ দেনা সম্বব নয়, ঠিক ওল যা ঘরঅ হুরে তে তারে হোই বলাবুলি দে দি গুরিবাক। উড়িং, চঙঁরা, গবঅ, য়্যেত, বান্দর, বেজী, বাজ উন্দুর, বেলেই, ধল্যাপুক, আদালি, যেন উড়োস, আ হেঁপুক্কও বাদ ন' যায়।

বিষুদবার। রাজমোনো এক্কান দলপজ্যা জাগাত টেম্মাঙঁত বলাক। তে এত্তে তে এজের, তে এত্তে তে এজের। চিগোনুন রাজার মুজুঙেঁ তা পরপর ডাঙঁরুনে পিজেদি।<br>শিয়াল্যা মাদি উদিল', বাপ ভেইলক, বেক্কুন থুবো অলে আমি হধা মেলি পারিদে নোনে? বেক্কুনে হলাক, পারিবং পারিবং....<br>শিয়াল্যা গলাহেম মারি, মাবালারান শিরাবোত্তুন গত্তনাত বেড়েই হুও ধল্য, শুনঅ বাপ ভেইলক; ঝাড়ত দ্বি দল আঘিই। এ্যমান আ পেক (পশু পক্ষী) পেক্কুনর জন গদে গদে যেন ঘর আঘে তারার রাজারও বলপিয়া গুরি লাচ্যা গাজত ঘর। মনে ক'লে বুইয়ার হার মনে ক'লে রোদ পোয়ার। হালিক, আমা এ্যমানুনর আমার যেন ঘরবাড়ি নেই রাজারও নেই। বেগর মান সম্মান আঘে। আমি প্রজামানুচ, আমার হি গাজতলে বাজতলে জিংকানি গেলেও ছারে। এচ্যে রাজায়, রাণীয়ে ঈলেইলে বিলেবিলে থেলে ইজ্জত কার যার???

হিয়ে এক্কা চুঞ্যাঁবুঞ্যাঁ মু অলাক হিয়ে হিয়ে এক্কা মাধা নীঃ গল্লাক। চগদাবো মাদি উদিলো "অয়দ এনে, অয়দ এনে...

তে হি গরানা? জেরেদি শেঝমেজ "রাজঘর" বানেবার সিদ্ধান্ত ওল। হরগোশয়ো ক'লঅ বানাহ সিদ্ধান্ত অলে অদঅ নয়চে, অমক্কর গুরি লেঘাপড়া গরঅ' দস্তক রাঘঅ। শুগোজ্যা ক'লঅ অয়দ, অয়দ...যে কোনো কাম আগেভাগে দরঅমরঅ ন' গল্লে ন' অয়। য়্যেত্য ক'লঅ সেদিঞ্যাঁ কারর পেঠপিড়া, ধাকপিড়া শুনোশুনি অদঅ নয়, দরকার অলে কামঅ বাগত এনেই চুন্দুল চুন্দুল গুরি থাদোক্কি।

সেদিঞ্যাঁ যা তাগল তে যা হুড়োল তে আনিবাক। গাজপুক্কোরে হুও অলঅ তা আড়ান হামাক্কায় আনোক। পুর বুজিলো মুজুঙোঁ রবিবারে রাজঘর তুলো এবাক।

রবিবার। বেগত্তুন আগে হেঁপুক্ক ভাতমজা পুনোত বানী লুম্মেগি। সে পরেদি ওরোস্সো, চগদা আদালিবো পরপর লুমিলাক্কি।

শিয়াল্যা মাবালারান মুওত্তুন হুলিনে ডাগি কঅর, এজঅ এজঅ ভেইলক ইন্দি এজঅ। ফেজানি এক্কা কাবগি। ফাগাড়া বলাউন এজঅ, ডেমাডেম্যা মাদিআনি এক্কা চাঝি দোগি।

বেলেইবো এক কুপ দ্বি দি দাই ক'লঅ, অজাত্যা তাগলান এদক্কি হেগা! ভেইলক তুমি থাগঅ মুই এক্কা তাগলান ধারাঙ্গোই!

বেলেইবো :-<br>তাগলান অয়ে আদালি পুন,<br>ছবাই নেইদি ধার।<br>ফেজা কাবদে তে নয় পারা,<br>পিয়িড়া গীত গার।

আদালিবো সোজে উদিলো, বেআক্কল্যা বেলেইবো! আ তুই ম' পুনোনত কিয়া একহামর?

পিয়িড়াবো মাদি উদিলো, কমলে দিখকচ মরে গীত গাধে?

তে এক হধা, তে এক হধা বাজেলাক জোল!

ধাবা ধাবা বাজ উন্দুরবো ক'লঅ ভেইলক চধে চধে, ম' মুওন এক্কা ;

উন্দুরবো :-

বিঞ্যেঁ এলুং ধাবা ধাবা,<br>হুদু মু ধনাহ?<br>রাঙাঁ দাত্তুন দেগেই ক'লঅ,<br>এক্কা রেনি চনাহ।

বাজ উন্দুরবো রাঙাঁ দাত্তুন দেঘি বেক্কুনে হিদিক হিদিক আঝি উদিলাক। ওতারা হুজ্জাআনও ভঙ্গ ওল।

বেল দিবোর ওল। উড়িংয়ো তুগুত তুগুত ভাতমজাউন রেনি চায়। ইন্দি এক দাগির হবরও নেই এবার। যেরেদি ক'লঅ আচ্ছা, আ আমিয়ে বানাহ বানাহ দুখ পের। আ এক দাগির দ এবঅ হবরও নেই। হেনে হেনে শুনিলো উড়োস্সো। কাম ত' গুরিনে বিড়বিড়া ধল্ল'। ভেইলক থহ' থহ'..... । এক্কা ন' মুজ্জোআর! বেগে হোলাক হি হি???<br>আঃ হি ; তুমি ন' দেঘর আমি চিগোন ভিলিনে আমারে সজ পান্নে। বড় বড় চেলাউনে দ' এবঅ এবার হবরও নেই। হাজিয়ে দ' বেল হুড়েদ'। বেগে ভাবীলাক অয়দি এ্যনাহ। তে হি গরানা?

পুণ্ডিক্যেরে হবর দ্যুও। রাজারে জানোক্কোই। বেক্কানি শুনি সিংহবোত্তুন চঙ্গা উদি গেলগোই! বেক্কুন ইজেপ ললাক। দেঘা গেলদে, য়্যেত্য, শুগরবো, আ হরগোশয়ো ন' এজন।

যঅ' যঅ' ইক্কি যঅ....<br>তারারে ইক্কে কানত ধুরি আনগোই। <br>যেব' কন্না? এতারে ক'লে মুই ন' পারিম, উতারে ক'লে পাত্তুং নয়। <br>ঝাড়বো হুগুরবো ক'লঅ, কত্তাবাবু চিওন মুয়েদি ডাঙঁর হধা, মাপ চাঙ।

একবার মুই সেদাম বাজে য়্যেত্যরে ভুগি চিয়ং, কানানও ন' লাড়ায়। কিয়া ডাঙঁর ভিলিনে কাররে হিয়া ন' গরে।

আদালিবো ক'লঅ কত্তাবাবু, শুগোরবো বেশ গাত্যা। কামেরেনে ধুলো ধুলো গুরি থেলেও হদা ন' কয়।

বান্দচ্যে ক'লঅ ; কত্তাবাবু মুই হরগোশয়োরে হঝা যে পারিম।

হেঁপুক্ক ক'লঅ কত্তাবাবু তুই উগুম দিলে মুই এক লগে ডেন আধে বাঙ আধে য়্যেত্যরে আ মালা শুগোরবোরে কানত ধুরি আনি পারিম্মোই।

সিংহবো ক'লঅ, যঅ' যঅ'....<br>তমারে উগুম দে ওল।

ইন্দি হরগোশয়ো ঘুম যার, পুনোত রোদ বাচ্ছে। বান্দচ্যে কানত ধুরি ঘুমে ঘুমে তারে রাজা মুজুঙত থলগি।

ইন্দি শুয়োজ্যা ভুলোং ধুবো সিধেন দি ঘুম যার। কোনো হধা নেই, হেঁপুক্ক শুগরবো কানঅ গরাত ধুরি য়্যেত্যরে তগার। য়্যেত্য তেল্যা হলা ভুইয়ত বুগুলিক হার। দি জনরে কানঅ গরাত ধুরি হেঁপুক্ক রাজারে গঝে দিলগি।

হরগোশয়ো ক'লঅ, কত্তাবাবু মুই ঘুমে থান ন' পাং।

য়্যেত্য ক'লঅ, কত্তাবাবু মুই পাওরি ফেল্লঙ্গোই। মুই মনে গুজ্জং এচ্যে শুনিবার।

শুয়োজ্যা ক'লঅ, কত্তাবাবু সমনে দিখকঙগে রবিবারে বেলে রাজঘর তুলো গেলে ন' ছুয়ে।

এ হধা সে হধা হধে হধে, সাজ! হুবোত আর কাম। ন' ওল রাজঘর তুলোনা। ন' ওল সিংহবোর ঘরত থানা।<br>সেনে ঝাড়র রাজা সিংহবোর ঘর নেই।<br>--------থুম--------

>>>> কান টানা হেই হরগোশয়ো কানানি সেনে লাম্বা উয়ে। এবঅ লাম্বা বাদে আঘে।<br>>>>> সিত্তুন ধুরি য়্যেত আ শুগরর কানঅ গরাত এন অকতত হেঁপুক থান।

( উপদেশ :- যে কোনো কামত বড় মাঞ্যেঁর অলিব বেশ। চিগোন মানুচ সোতসোত্যা)